Ушырасыўымыздың барлық қатнасыўшыларын және бир мәрте қутлықлаўдан қуўанышлыман.
Бәринен бурын, Түркменстан Президенти, ҳүрметли Сердар Гурбангулиевич Бердимуҳамедовқа бул жерде бизди бәрқулла шын жүректен күтип алып атырғаны ушын шын жүректен миннетдаршылық билдиремен.
Мәжилисимиздиң ҳүрметли мийманы – Иран Ислам Республикасы Президенти, ҳүрметли Масъуд Пезешкиян мырзаны қутлықлайман.
Өзбекстан Республикасының 2027-жылы ҒМДАға басшылық етиўи ҳаққындағы қарарды қоллап-қуўатлағаны ушын да барлық кәсиплеслериме өз миннетдаршылығымды билдиремен.
Дослық Аўқамына басшылық етиў биз ушын, бәринен бурын, улыўма жумысымызға өз үлесимизди қосыў, жаңа идеяларды усыныс етиў ҳәм бүгинги күнде мәмлекетлеримиз ушын шынында да әҳмийетли болған бағдарларды биргеликте раўажландырыў имканияты деген сөз.
Келеси жылы анық ҳәм сезилерли нәтийже беретуғын мәселелерди дыққат орайына қойыў нийетиндемиз. Булар – экономика, жаңа технологиялар, транспорт, қәўипсизлик, билимлендириў, илим ҳәм инсан потенциалын раўажландырыў болып табылады.
Биз Өзбекстанның басшылығы ушын белгиленген “ҒМДА – исеним ҳәм улыўма раўажланыў мәканы” деген сүренде мине, усы қатнасты жәмледик. Бүгинги күнде Басшылық концепциясы ҳәм Илажлар режеси үстиндеги жумысларды жуўмақламақтамыз. Оларда ҳәзирдиң өзинде жүзден аслам анық илажлар нәзерде тутылған.
Бул бағдарлама әпиўайы басламалар дизими болып қалмаўы биз ушын әҳмийетли. Ҳәр бир бағдар бойынша анық қәдемлер, мүддетлер ҳәм биз биргеликте ерисилетуғын нәтийже болыўы керек.
Басшылығымыз дәўиринде мине, усындай әмелий жумысларға итибар қаратыўды қәлеймиз.
Ҳүрметли мәжилис қатнасыўшылары!
Дослық Аўқамы шеңбериндеги сиясий сөйлесиўге айрықша итибар қаратыўымыз зәрүр.
Бүгин дүньяда жағдай барған сайын қыйынласып атырған бир ўақытта ҳәр қандай мәселени тынышлық пенен додалаў, бир-биримизди тыңлаў ҳәм бәршемизге мақул болған шешимлерди излеў имканиятын сақлап қалыў оғада әҳмийетли болып есапланады.
Жақсы қоңсышылық, өз-ара исеним ҳәм түсинисиў еллеримиз арасындағы қатнасықлардың тийкары болып қалады ҳәм бул фундаментти беккемлеў зәрүр.
Экономикада тийкарғы итибарды санаат кооперациясына қаратыўды усыныс етемиз. Мәмлекетлеримиз салмақлы өндирислик имканиятлар, ресурслар, технологиялар ҳәм базарларға ийе. Егер мине, усы потенциалымызды бирлестирсек, биргеликтеги өндирислик қуўатлықларды жаратсак ҳәм турақлы жеткерип бериў шынжырларын жолға қойсақ, барлық қатнасыўшылар ушын нәтийже және де сезилерли болады.
Сонлықтан, биз санаат кооперациясын раўажландырыў ҳәм өз-ара инвестициялар ушын шараятларды жақсылаўға айрықша итибар қаратамыз. Соның менен бирге, мәмлекетлеримиз арасындағы саўда-сатыққа елеге шекем тосқынлық етип киятырған тосқынлықларды сапластырыў үлкен әҳмийетке ийе.
Бирге ислесиўдиң айрықша бағдары санлы технологиялар менен байланыслы. Биз олардан бизнесте пайдаланыўды кеңейтиў, электрон коммерцияны раўажландырыўды әҳмийетли деп есаплаймыз.
Бул процессте тек ҳәзирдиң өзинде де жақсы раўажланған тараўлар менен шекленип қалмаў керек. Алға қәдем таслаў ҳәм жақын жылларда мәмлекетлеримиз экономикасының бәсекиге шыдамлылығын арттырыў менен байланыслы болатуғын тараўларда биргеликте ислесиў зәрүр.
Бул жерде сөз әҳмийетли минераллар, жасалма интеллект, роботластырыў, жаңа материаллар ҳәм заманагөй энергетика технологиялары тараўлары ҳаққында бармақта. Әне, усы тараўлар бүгинги күнде өз компетенцияларымыз ҳәм биргеликтеги жойбарларды жаратқан ҳалда, артта қалып кетпеўимиз әҳмийетли болған бағдарлар болып есапланады.
Басшылығымыздың және бир әҳмийетли бағдары транспорт пенен байланыслы.
Орайлық Азия бүгинги күнде Шығыс ҳәм Батыс, Арқа ҳәм Қубла арасындағы әҳмийетли транспорт түйини болып бармақта. Биз бул имканиятлардан толық пайдаланыўымыз керек. Буның ушын транзит тәртип-қағыйдаларын әпиўайыластырыў ҳәм қолайлы, қәўипсиз және экономикалық жақтан пайдалы болған жөнелислерди жаратыў әҳмийетли.
Биз Орайлық Азия транспорт тармағы ҒМДА мәканында ҳәм оның сыртындағы улыўма байланыслар системасының әҳмийетли бөлегине айланыўынан мәпдармыз.
Ҳүрметли кәсиплеслер!
Қәўипсиз ҳәм турақлы орталықсыз я экономика, я саўда, я ири биргеликтеги жойбарлар болыўы мүмкин емес. Сонлықтан басшылығымыз дәўиринде усы бағдар да ең әҳмийетли тараўлардан бири болып қалады.
Биз ҒМДАның тараўлық уйымларының жумысын ҳәм мәмлекетлеримиздиң улыўма қәўип-қәтерлерге қарсы гүресиў бағдарындағы ҳәрекетлерин қоллап-қуўатлаймыз. Бул жерде сөз терроризм, экстремизм ҳәм кибержынаятшылық ҳаққында бармақта.
Бул қәўиплердиң барлығы әллеқашан айырым мәмлекетлердиӊ шегарасынан шығып кеткен.
Әсиресе, бүгинги күнде кибержынаятшылық тез күшеймекте. Ол әпиўайы пуқаралар, бизнес ўәкиллери, банклер, мәмлекетлик системаларға тәсир етпекте ҳәм сол себепли, турақлы итибарды және мәмлекетлеримиз арасында тығыз бирге ислесиўди талап етеди.
Ҳүрметли мәжилис қатнасыўшылары!
Дослық Аўқамының келешеги ҳаққында сөз етер екенбиз, мәмлекетлеримизди инсанлар байланыстырып туратуғынын да еске алыўымыз әҳмийетли. Бул инсанлар арасында бир неше он жыллар даўамында қәлиплескен байланыслар. Усы байланыслар көп жағынан қатнасықларымыздың турақлылығын белгилейди.
Соның ушын студентлер, жас қәнигелер, илимпазлар, изертлеўшилер ҳәм дөретиўши кәсип ийелериниң өз-ара пикирлесиўи, бир-биринен үйрениўи ҳәм биргеликте ислеўи ушын көбирек имканиятларға ийе болыўы әҳмийетли.
Бул, әсиресе, жасларға тийисли. Дослық Аўқамы келешекте қандай болыўын жас әўлад белгилейди.
Мәмлекетлеримиз үлкен инсаный ҳәм интеллектуаллық потенциалға ийе. Бул потенциал заманагөй өндирис қуўатлықлары, инновациялар ҳәм жаңа жумыс орынларын жаратыўға хызмет ететуғын шараятларды жаратыўы зәрүр.
Барлық жумысымыз орайында инсан, оның қәдир-қымбаты, мәплери ҳәм имканиятларын жүзеге шығарыў турыўы керек. Тек ғана сонда ҒМДА билим алыў, мийнет етиў, жаңа жойбарларды жаратыў, шериклер табыў ҳәм өз келешегин қурыўы мүмкин болған мәкан сыпатында қабыл етиледи.
Ҳүрметли кәсиплеслер!
Биз басшылығымыздан өзиниң нәтийжелилигин дәлиллеген барлық жетискенликлерди сақлап қалыў ҳәм соның менен бирге, бүгинги күнде жаңа шешимлер табыў зәрүр болған бағдарлардың раўажланыўына қосымша пәт бағышлаў ушын пайдаланыў нийетиндемиз.
Нәтийжеде тек ғана қабыл етилген ҳүжжетлер ҳәм келисимлер емес, ал келешекте де пайда келтиретуғын анық нәтийжелерге ерисиў әҳмийетли болып есапланады.
Бул исте Дослық Аўқамының барлық мәмлекетлери қоллап-қуўатлаўына үмит етемиз.
Сөзимниң жуўмағында ҳүрметли Сердар Гурбангулиевич Бердимуҳамедовқа миймандослық ҳәм ушырасыўымызды әжайып тәризде шөлкемлестиргени ушын және бир мәрте миннетдаршылық билдиремен.
Итибарыңыз ушын рахмет.
