Өзбекстан Республикасы Президенти Шавкат Мирзиёев 2027-жылы Ғәрезсиз Мәмлекетлердиң Дослық Аўқамына басшылық етиўдиң тийкарғы бағдарларын көрсетип өтти.
Мәмлекетимиз басшысы өзиниң шығып сөйлеген сөзинде барлық кәсиплеслерине қабыл етилген қарарды қоллап-қуўатлағаны ҳәм улыўма жумысқа Өзбекстанның үлесин қосыў, жаңа идеяларды усыныў ҳәм ҳәзирги күнде Дослық Аўқамы мәмлекетлери ушын шын мәнисинде әҳмийетли болған бағдарларды биргеликте алға қойыў имканияты ушын миннетдаршылық билдирди.
- Келеси жылы түсиникли ҳәм сезилерли нәтийже беретуғын бағдарлар дыққат орайында болыўын қәлеймиз. Бул – экономика, жаңа технологиялар, транспорт, қәўипсизлик, билимлендириў, илим ҳәм инсан капиталын раўажландырыў, – деди Шавкат Мирзиёев.
Бундай қатнас Өзбекстан басшылығының "ҒМДА – исеним ҳәм улыўма раўажланыў мәканы" деген сүренине тийкар салынған.
Ҳәзирги ўақытта Басшылық концепциясы ҳәм Илажлар режеси үстинде жумыслар жуўмақланбақта, оларда жүзден аслам анық илажлар нәзерде тутылған.
Өзбекстанның басшылығы дәўиринде әмелге асырылатуғын жумыслардың тийкарғы бағдарлары ҳәм механизмлери таныстырылды.
Дослық Аўқамы шеңбериндеги сиясий сөйлесиўге айрықша итибар қаратылады.
- Дүньяда жағдай барған сайын қыйынласып атырған бүгинги күнде ҳәр қандай мәселени тынышлық пенен додалаў, бир-биримизди тыңлаў ҳәм бәршемизди қанаатландыратуғын шешимлерди излеў имканиятын сақлап қалыў оғада әҳмийетли, – деди мәмлекетимиз басшысы.
Экономикада ҒМДА мәмлекетлери үлкен өндирислик имканиятлар, ресурслар, технологиялар ҳәм базарларға ийе екенинен келип шығып, тийкарғы итибарды санаат кооперациясына қаратыў усыныс етилди.
- Бул потенциалды бирлестирип, қоспа кәрханалар шөлкемлестирсек, турақлы жеткерип бериў шынжырын қурсақ, нәтийже барлық қатнасыўшылар ушын жүдә сезилерли болады, – деди Президент.
Бул бағдарда мәмлекетлер арасындағы саўда-сатыққа тосқынлық етип атырған тосқынлықларды буннан былай да сапластырыў тийкарғы әҳмийетке ийе болады.
Санлы технологиялар менен байланыслы бағдар ҳәм тек ғана жақсы раўажланған тараўлар менен шекленип қалмастан, олардан пайдаланыўды кеңейтиў әҳмийетли екенлиги айрықша атап өтилди.
- Келеси жылларда экономикаларымыздың бәсекиге шыдамлылығы байланыслы болатуғын тараўларда биргеликте жумыс алып барыўымыз керек. Гәп әҳмийетли минераллар, жасалма интеллект, роботластырыў, жаңа материаллар ҳәм заманагөй энергетика технологиялары ҳаққында бармақта. Бүгин бул бағдарларда артта қалмаў, өз қәнигеликлеримизди ҳәм биргеликтеги жойбарларды жаратыў айрықша әҳмийетке ийе, – деди Өзбекстан жетекшиси.
Басшылықтың және бир тийкарғы бағдары транспорт тараўы етип белгиленди. Орайлық Азия Шығыс ҳәм Батыс, Арқа ҳәм Қубла арасындағы әҳмийетли транспорт хабына айланып атырғаны атап өтилди.
- Бул имканиятлардан толық пайдаланыўымыз зәрүр. Буның ушын транзит тәртип-қағыйдаларын әпиўайыластырыў, қолайлы, қәўипсиз ҳәм экономикалық пайдалы жөнелислерди жаратыў әҳмийетли, – деди мәмлекетимиз басшысы.
Қәўипсизлик ҳәм турақлылықты тәмийинлеў Өзбекстанның басшылығы дәўиринде де бирге ислесиўдиң әҳмийетли бағдары болып қалады.
- Биз ҒМДА қәнигелескен уйымларының жумысын ҳәм мәмлекетлеримиздиң улыўма қәўип-қәтерлерге қарсы гүресиў бағдарындағы ҳәрекетлерин қоллап-қуўатлаймыз. Гәп терроризм, экстремизм ҳәм кибержынаятшылық ҳаққында бармақта. Бул қәўип-қәтерлердиң барлығы айырым мәмлекетлер шеңберинен әлле қашан шығып кетти, – деди Президентимиз.
Әпиўайы пуқаралар, бизнес, банклер ҳәм мәмлекетлик системаларға тиккелей тәсир етип атырған, ҳәўиж алып атырған кибержынаятшылыққа қарсы гүресиўге айрықша итибар қаратылады.
Мәмлекетлераралық қатнасықлардың турақлылығын көп жағынан белгилеп беретуғын инсаныйлық байланыслар тийкарғы бағдар сыпатында көрсетип өтилди.
Студентлер, жас қәнигелер, илимпазлар, изертлеўшилер ҳәм дөретиўшилик тараў ўәкиллериниң бир-бири менен көбирек байланысыўы, бир-биринен үйрениўи, биргеликте ислеўи әҳмийетли екенлиги атап өтилди.
- Барлық жумысларымыздың орайында инсан, оның қәдири, мәплери ҳәм имканиятлары турыўы керек. Сонда ғана ҒМДА билим алыў, жумыс ислеў, жаңа жойбарлар жаратыў, шериклер табыў ҳәм өз келешегин қурыў ушын кеңислик сыпатында қабыл етиледи, – деп айрықша атап өтти Шавкат Мирзиёев.
Сөйлесиўдиң жуўмағында Өзбекстанның Дослық Аўқамына басшылығынан нәтийжели әмелиятларды сақлап қалыў, соның менен бирге, бүгинги күнде жаңа шешимлер зәрүр болған бағдарларға қосымша пәт бағышлаў мақсетинде пайдаланыўға исенимли умтылыў билдирилди.
Өзбекстан басшысы Түркменстан Президенти Сердар Бердимуҳамедовқа миймандослық ҳәм саммит жоқары дәрежеде шөлкемлестирилгени ушын шын жүректен миннетдаршылық билдирди.
Саммит жуўмағында ҒМДА шеңбериндеги бирге ислесиўдиң тийкарғы бағдарлары бойынша келисимлер ҳәм қарарлар топламына қол қойылды.
