Өзбекстан Республикасы Президентиниң 2026-жыл 9-июль күни Беларусь Республикасына мәмлекетлик сапары Өзбекстан - Беларусь қатнасықларын стратегиялық дәрежеге алып шығып, сиясий, экономикалық ҳәм гуманитарлық бирге ислесиўди және де тереңлестириўге хызмет етти. Сапар шеңберинде саўда-экономикалық байланысларды, санаат кооперациясын кеңейтиў, қоспа инвестициялық жойбарларды әмелге асырыў ҳәм аймақлараралық бирге ислесиў бойынша әҳмийетли келисимлерге ерисилди.

Бул келисимлерди әмелге асырыўда еки мәмлекет парламентлери әҳмийетли орын ийелеп, ҳуқықый базаны жетилистириўге, парламент дипломатиясы арқалы қабыл етилген қарарлардың орынланыўын тәмийинлеўге жәрдемлеспекте.

Усы мәниде, мәжилисте Өзбекстан - Беларусь парламентлераралық форумына таярлық көриў, оны жоқары дәрежеде шөлкемлестириў, бирге ислесиў бойынша жаңа келисимлерге ерисиўге қаратылған илажлар, форум нәтийжелерин кең жәмийетшиликке жеткериў бойынша илажлар шеңберинде белгиленген ўазыйпалар додаланды.

Форумның тийкарғы мақсети парламентлераралық сөйлесиў ҳәм парламент дипломатиясын раўажландырыў, саўда-экономикалық, инвестициялық ҳәм инновациялық бирге ислесиўди қоллап-қуўатлаўдың нызамшылық механизмлерин жетилистириў, сондай-ақ, санаат кооперациясы, санлы трансформация, агросанаат комплекси, денсаўлықты сақлаў, билимлендириў, туризм ҳәм инсан капиталын раўажландырыў тараўларында қоспа жойбарларды әмелге асырыўға жәрдемлесиў арқалы Өзбекстан ҳәм Беларусь арасындағы стратегиялық шерикликти беккемлеўден ибарат.

Форум шеңберинде Парламентлераралық комиссия, Жаслар парламентлериниң мәжилиси, жергиликли ўәкилликли уйымлардың ушырасыўы ҳәм төртинши Өзбекстан-Беларусь ҳаял-қызлар бизнес форумын шөлкемлестириў режелестирилген.

Өзбекстан - Беларусь бирге ислесиўиниң әҳмийетли әмелий нәтийжелеринен бири Өзбекстан - Беларусь ҳаял-қызлар бизнес-форумлары еки мәмлекет исбилермен топарлары арасында нәтийжели сөйлесиў майданы сыпатында өзин көрсеткенин атап өтиў керек. Форумлар шеңберинде жүзлеген коммерциялық шәртнамалар, инвестициялық келисимлер ҳәм бирге ислесиў ҳаққындағы меморандумларға қол қойылғаны еки ел исбилерменлери арасында беккем исбилерменлик байланысларын қәлиплестириўге хызмет етпекте.

Мағлыўмат ушын: 2023-жыл сентябрь айында Минск қаласында өткерилген биринши Өзбекстан - Беларусь ҳаял-қызлар бизнес форумында улыўма баҳасы 28,7 миллион АҚШ долларынан аслам 42 ҳүжжетке қол қойылған. 2024-жыл август айында Ташкентте өткерилген екинши форум жуўмақлары бойынша улыўма баҳасы 89 миллион АҚШ долларынан аслам болған 43 коммерциялық келисим ҳәм 22 меморандум қабыл етилди. 2025-жылы өткерилетуғын үшинши форумда жәми 49 ҳүжжет, соның ишинде, баҳасы 88,2 миллион АҚШ доллары болған 27 коммерциялық шәртнамаға қол қойылды.

Төртинши бизнес-форумда төрт секция, соның ишинде, санаат кооперациясы, биргеликтеги инвестициялар ҳәм мийнет потенциалынан пайдаланыў, агросанаат комплексинде азық-аўқат қәўипсизлиги ҳәм биотехнологиялар, гуманитарлық ҳәм социаллық тараўларда, туризм тараўында бирге ислесиў ҳәм биргеликтеги жойбарларды әмелге асырыў мәселелери додаланыўы режелестирилген.

Буннан тысқары, исбилермен ҳаял-қызлар ҳәм еки мәмлекеттиң мәмлекетлик уйымлары арасында «B2B» ҳәм «G2B» форматында ушырасыўлар өткериў, коммерциялық шәртнамалар, келисимлер ҳәм бирге ислесиў меморандумларын дүзиў бойынша келисимлер нәзерде тутылмақта.

Жуўапкер министрликлер ҳәм уйымларға Өзбекстан - Беларусь парламентлераралық форумын жоқары дәрежеде өткериў бойынша анық тапсырмалар берилди.