Әсиресе, инсан капиталы көрсеткиши әҳмийетли нәтийже болды: Ташкент дүньяда 108-орынды ийеледи. 2024-жылы қала 136-орында, 2025-жылы болса 123-орында еди. Солай етип, рейтингтиң үш саны даўамында пайтахт халықтың билим, көнликпе ҳәм кәсиплик потенциалын сәўлелендириўши көрсеткиш бойынша турақлы унамлы динамиканы көрсетпекте.

Бул Ташкент қаласының раўажланыў динамикасын көрсететуғын бирден-бир халықаралық изертлеў емес. 2025-жылы өткерилген ҳәм 2026-жыл 21-майда жәрияланған “Boston Consulting Group Built to Change: How Cities Compete for the Future” изертлеўине бола, Ташкент өзгерислер тезлиги бойынша дүньядағы 80 қаланың ишинде тек ғана Шэньчжэн ҳәм Ар-Риядтан кейин үшинши орынды ийеледи. Соның менен бирге, экономикалық белсендиликтеги өзгерислер тезлиги бойынша пайтахтымыз биринши орынды ийеледи.

“BCG” тек ғана қалалардың ҳәзирги жағдайын емес, ал олардың раўажланыў, бейимлесиў ҳәм халық ушын шараятларды жақсылаў тезлигин де баҳалаған. Изертлеў 200 ден аслам көрсеткишти қамтып алады ҳәм дүнья бойлап 24 мың қала халқы арасында өткерилген сораўнама нәтийжелерин есапқа алады.

Бул көрсеткишлер артында ҳәр күни пайтахтымыздың раўажланыўына үлес қосып киятырған инсанлар - муғаллим ҳәм шыпакерлер, инженер ҳәм исбилерменлер, қала хызметкерлери, студентлер ҳәм жаслар турады. Олардың билими, басламасы ҳәм мийнети Ташкенттиң раўажланыўына хызмет етпекте.

Бундай нәтийжелерге Президент Шавкат Мирзиёевтиң басламасы менен әмелге асырылып атырған жаңаланыўлар, Президент Администрациясының пайтахтымыздың раўажланыўына итибары, қала ҳәм район командаларының өз-ара муўапық жумысы, исбилерменлердиң ҳәрекетлери, халықтың белсене қатнасыўы себепли ерисилмекте.

Халықаралық аналитиклер, сондай-ақ, Ташкентти “Cities to Watch” - раўажланыўын бақлаў усыныс етилетуғын қалалар дизимине киргизди. Пайтахт ҳәкимлиги бул қаланы раўажландырыў бойынша биргеликтеги ҳәрекетлердиң тән алыныўы екенин атап өтти.

Соның менен бирге, халықаралық рейтинглердеги жоқары орынлар, бәринен бурын, жүз берип атырған өзгерислер қала халқының күнделикли турмысында өз көринисин тапқанында әҳмийетли. Пайтахтта қала орталығының сапасы, ҳаўаның тазалығы ҳәм ҳәр бир районның қолайлығы бойынша жумысларды даўам еттириў керек. Экономикалық өсиў Ташкент қаласында халықтың билим алыўы, мийнет етиўи, өз бизнесин раўажландырыўы ҳәм перзентлерин тәрбиялаўы ушын жаңа имканиятлар жаратыўы керек.

"Биз биргеликте ерискенлеримиз бенен мақтанамыз. Буннан кейин ким ушын - Ташкент халқы ушын жумыс ислеў кереклигин де билемиз", - деп атап өтти пайтахт ҳәкимлиги.