Ушырасыўда Өзбекстан ҳәм БМШ арасындағы стратегиялық бирге ислесиўди
буннан былай да беккемлеў, туризмди турақлы раўажландырыў принциплерин алға қойыў,
туристлик бағдарлардың бәсекиге шыдамлылығын арттырыў, инсан капиталын
раўажландырыў, халықаралық ҳәм регионаллық бирге ислесиўди кеңейтиў мәселелери
додаланды.
"2027-жыл - Халықаралық турақлы ҳәм қолайлы туризм жылы"ның
рәсмий ашылыўына таярлық көриў мәселелерине айрықша итибар қаратылды. Ташкент халықаралық туризм ярмаркасының рәсмий
ашылыў мәресими 2026-жыл ноябрь айында Ташкент қаласында "Жипек жолында
туризм" халықаралық туризм ярмаркасы шеңберинде өткерилиўи
режелестирилген.
Ашылыў мәресимин
Өзбекстанда өткериў басламасы Өзбекстан Республикасы Президенти Шавкат Мирзиёев
тәрепинен 2026-жыл 1-апрель күни БМШ басшылары менен ушырасыўда алға қойылған
еди.
Сөйлесиўлердиң
әҳмийетли нәтийжеси сыпатында "2027-жыл - Халықаралық турақлы ҳәм қолайлы
туризм жылы"ның рәсмий ашылыў мәресимин өткериў ҳаққындағы келисимге қол
қойылды. Ҳүжжет илажға әмелий таярлық көриў, сондай-ақ, Өзбекстан ҳәм БМШ
тәрепинен әмелге асырылып атырған илажларды муўапықластырыў ушын зәрүр
ҳуқықый-шөлкемлестириўшилик тийкар жаратады.
Ашылыў
мәресиминиң Ташкентте өткерилиўи турақлы ҳәм қолайлы туризм принциплерин
халықаралық көлемде үгит-нәсиятлаўға хызмет етеди. Соның менен бирге, бул әҳмийетли
халықаралық илаж Өзбекстанның глобал туризм күн тәртибин қәлиплестириўдеги
белсене қатнасыўын және де беккемлеў ҳәм 2027-жыл шеңберинде халықаралық бирге
ислесиўди раўажландырыў ушын әҳмийетли платформа болады.
Ушырасыў
даўамында Бас хаткер, сондай-ақ, мәмлекетимиз басшысының басламасы менен
қәўипсиз туризм кодексин ислеп шығыў процеси жеке қадағалаўында екенин мәлим
етти. Оның атап өтиўинше, ҳәзирги ўақытта мәмлекетлер ҳәм халықаралық
экспертлер менен бул бағдардағы жумыслар жеделлеспекте.
