Saida Mirziyoyeva o‘zining Telegram sahifasida Buxoroda ko‘zdan kechirilgan bolalar bog‘chalari va poliklinikalarning ahvoli «nihoyatda achinarli» ekanini qayd etdi.

Ma’lum qilinishicha, 1977 yilda ochilgan 21-sonli bolalar bog‘chasi qaytadan quriladi. Shuningdek, 46 ming nafar aholiga xizmat ko‘rsatuvchi 9-sonli poliklinika uchun yangi bino barpo etiladi.

Qayd etilishicha, mazkur poliklinika hozirda 1972 yilda qurilgan va tibbiy standartlarga javob bermaydigan binoda — kam ta’minlangan fuqarolar uchun mo‘ljallangan yotoqxonada faoliyat yuritmoqda. Bino to‘liq ta’mirlanib, u yerda yashovchilarning yashash sharoitlari yaxshilanishi bildirildi.

Bundan tashqari, kelgusi ikki yil ichida Buxoro viloyatining chekka tumanlarida joylashgan yana 36 ta poliklinikani rekonstruktsiya qilish rejalashtirilgan.

Uning ta’kidlashicha, hududlarga amalga oshirilayotgan safarlar Prezident topshiriqlari ijrosini nazorat qilish va joylardagi muammolarni bartaraf etishga qaratilgan.