Ҳаўаның суўытыўы себепли Энергетика министрлиги ҳәм системалы шөлкемлер тәрепинен турақлы энергия тәмийнатын тәмийинлеў илажлары көрилмекте. Ташкент қаласы ҳәм басқа да аймақларда жылытыў мәўсимине таярлық көрилмекте.
Энергетика министрлигиниң мәлим етиўинше, тәбийғый газди бөлистириўде турақ жайлар, мектеплер, бақшалар, емлеўханалар ҳәм басқа да социаллық объектлерге үстинлик бериледи.
Зәрүр жағдайларда мәўсимлик тутыныўшылар, соның ишинде, автомобильге газ толтырыў компрессор станцияларының жумысы ўақтынша шеклениўи мүмкин. Бундай шеклеўлер ҳәкимликлер менен келисилген ҳалда тастыйықланған графиклер тийкарында енгизиледи. Тутыныўшылар алдын ала хабардар етиледи.
Газ ҳәм электр тәмийнаты үзилислери пайда болғанда қай жерге мүрәжат етиў керек?
☎️ 1104 - газ басымы ҳәм жеткерип бериў мәселелери;
☎️ 104 - авария газ хызмети;
☎️ 1154 - электр энергиясының өшиўи ҳәм электр тармақларындағы насазлықлар.
Мүрәжатлар күни-түни қабыл етилип, машқалаларды жедел сапластырыў ушын жуўапкер қәнигелерге тапсырылады.
Тармақларға нызамсыз жалғаныў ямаса энергия ресурсларынан нызамсыз пайдаланыў жағдайлары бойынша "Өзэнергоинспекция"ның +998 71 208-10-15 телефон номерлери арқалы хабар бериў мүмкин.
Суўық дәўирдеги тийкарғы қәўипсизлик қағыйдалары:
Ысытыў ҳәм газ үскенелериниң, морылардың, вентиляция каналларының сазлығын тексериң.
Нызамсыз әсбаплардан пайдаланбаў, газ плитасы жәрдеминде хананы ысытыў мүмкин емес - бул ийис газинен зәҳәрлениўге алып келиўи мүмкин.
Электр сымлары ҳәм розеткаларды артықша жүклемең, бир узайтқышқа бир неше күшли әсбапларды жалғамаң.
Ислеп турған ысытыў әсбапларын қараўсыз қалдырмаң.
Сондай-ақ, энергия ресурсларынан ақылға уғрас пайдаланыў: керексиз электр әсбапларын өшириў, ысытқышлардан ақылға муўапық муғдарда пайдаланыў, ханаларда ыссылықты сақлаў зәрүр. Бул есабынан қәрежетлер азайып, энергетика тармақларына жүклеме азаяды.
