Президентимиздиң тапсырмаларына муўапық, Нөкис районында улыўма
қуўатлылығы 1 ГВт болған дата-орайларды өз ишине алатуғын технопарк
шөлкемлестириледи. Бул технопаркти "жасыл" энергия менен тәмийинлеў
нәзерде тутылған.
Жойбар шеңберинде Қарақалпақстандағы перспективалы самал электр
станцияларының қуўатлықларын дата-орайлар менен байланыстырыў ушын жаңа электр
инфраструктурасы қурылады.
Атап айтқанда, 500/220 кВ кернеўли жаңа подстанция ҳәм қосымша 220 кВ
электр узатыў тармағы қурылады. Бул инфраструктура Нөкистеги дата-орайларды
региондағы 3,3 ГВт қуўатлылықтағы самал электр станциялары менен байланыстырыў
ҳәм оларды электр энергиясы менен тәмийинлеў имканиятын береди.
Онда
дата-орайлардың электр энергиясына болған талабы халық ҳәм экономика
тармақларының ҳәзирги тутыныўына тәсир көрсетпеген ҳалда тәмийинленеди. Буның
ушын дата-орайларды айрықша аймақта жәмлестириў ҳәм оларды зәрүр энергетика
инфраструктурасы менен тәмийинлеўге комплексли қатнас жүргизиледи.
Дата-орайларды
бир жерде жайластырыў арқалы инфраструктураға жумсалатуғын қәрежетлерди
оптималластырыў, электр тәмийнатын нәтийжели шөлкемлестириў имканияты
жаратылады. Соның менен бирге, шөлкемлестирилетуғын бул ири дата-орайлар тек
ғана Өзбекстан емес, ал пүткил регион ушын санлы хызметлер ҳәм жоқары
технологиялы шешимлерди усыныўға хызмет етиўи нәзерде тутылмақта.
Жаңа энергетика
инфраструктурасының биринши басқышын 2027-жылдың 2-ярым жыллығында ҳәм толық
қуўатлылықта 2028-жылдың 2-ярым жыллығында иске қосыў режелестирилген.
Жойбарды әмелге
асырыў нәтийжесинде жаңа дата-орайларды электр энергетика системасына
интеграциялаў, жоқары технологиялы инвестицияларды тартыў ҳәм Қарақалпақстанның
бар энергетикалық потенциалынан нәтийжели пайдаланыў ушын зәрүр шараят
жаратылады.
