Мұндай келісім Біріккен Ұлттар Ұйымының Климаттың өзгеруі бойынша 31-конференциясы (UNFCCC COP31) аясында Түркияның Анталия қаласында өткен кездесуде жасалды.
Онда Өзбекстан Президентінің экология мәселелері бойынша кеңесшісі, Экология және климаттың өзгеруі ұлттық комитетінің төрағасы Азиз Абдухакимов пен Түркияның Қоршаған орта, урбанизация және климаттың өзгеруі министрі Мурат Курум қатысты.
Келіссөздер қорытындысы бойынша Өзбекстан Республикасы Экология және климаттың өзгеруі ұлттық комитеті мен Түркияның Қоршаған орта, урбанизация және климаттың өзгеруі министрлігі арасында қоршаған ортаны қорғау саласындағы өзара түсіністік туралы меморандумға қол қойылды.
Құжатқа сәйкес, тараптар атмосфералық ауа мен су ресурстарының ластануының алдын алу, табиғи ресурстар мен ерекше қорғалатын аумақтарды сақтау, шөлейттену және жердің тозуына қарсы күрес бағыттарында ынтымақтастық жасайды.
Сонымен қатар қоқыстарды басқару, айналмалы экономиканы және экологиялық мәдениетті дамыту, климаттың өзгеруі салдарын жұмсарту және оған бейімделу бағыттарында тәжірибе алмасу, сондай-ақ бірлескен жобаларды жүзеге асыру жоспарланған.
Кездесу барысында ұлттық климаттық міндеттемелерді инвесторлар үшін тартымды жобаларға айналдыруға бағытталған BRIDGE бастамасы да талқыланды.
Бұдан бөлек, Түркияның 2027 жылғы 15–17 маусым күндері Ташкентте өтетін «Eco Expo Central Asia 2027» халықаралық көрмесіне қатысу мүмкіндіктері қарастырылды.
Меморандум экологиялық мәселелерді шешу бағытында екі ел арасында тәжірибе алмасуға және бірлескен бастамаларды жүзеге асыруға негіз болады.
