Infografikada ishlab chiqarishni robotlashtirish darajasi eng yuqori bo‘lgan 22 ta mamlakat iqtisodiyoti keltirilgan. Robotlashtirish ko‘rsatkichi 2024-yilda ishlab chiqarish sanoatining har 10 000 ishchisiga to‘g‘ri keladigan amaldagi sanoat robotlari sonidir. Ma’lumotlar Xalqaro robototexnika federatsiyasi (IFR) tomonidan 2026-yil aprel oyida e’lon qilingan. Janubiy Koreya va Singapur reytingda qayd etilgan mamlakatlardan sezilarli darajada oldinda. Ikkala iqtisodiyotda ham yuqori darajadagi avtomatlashtirish sanoat sektoridagi ishchilar sonining nisbatan kamligi bilan birga keladi.
Janubiy Koreyada ishlab chiqarish sanoatidagi har 10 000 ishchiga 1220 ta robot to‘g‘ri keladi, bu dunyodagi o‘rtacha 132 ta robotdan to‘qqiz baravar ko‘pdir. Singapurda bu ko‘rsatkich 818 tani tashkil etadi, bu uchinchi o‘rinni egallagan Germaniya natijasidan (449) deyarli ikki baravar ko‘pdir, deb xabar berdi naked-science.ru.
Janubiy Koreya jahonga mashhur elektronika sanoati va yirik avtomobil sanoatiga ega. Aynan shu ikki soha dunyodagi sanoat robotlarining eng yirik iste’molchilari hisoblanadi: 2024-yilda ular jami yangi qurilmalarning deyarli yarmini tashkil etgan. Avtomatlashtirishni rag‘batlantiruvchi qo‘shimcha omil demografik vaziyatdir. 2025-yilda Janubiy Koreyada tug‘ilishning umumiy darajasi har bir ayolga 0,75 bolani tashkil etdi va bu dunyodagi eng past ko‘rsatkichlardan biri sanaladi. Natijada ishlab chiqaruvchilar mavjud ishchi kuchining qisqarishiga duch keladi.
Ishlab chiqarish sanoatida ishlovchilar soni nisbatan kam bo‘lgan kichik mamlakat — Singapurda ham shunga o‘xshash vaziyat yuzaga kelmoqda. Bu yerda tug‘ilish koeffitsiyenti ham har bir ayolga to‘g‘ri keladigan bir boladan past bo‘lib, 0,96 ni tashkil etadi.
Xitoy esa buning aksini ko‘rsatmoqda. 2024-yilda mamlakatda ikki millionga yaqin sanoat robotlari qo‘llanilgan – bu butun dunyo parkining taxminan 43 foizini tashkil etadi. Biroq, ishlab chiqarish sanoatida ishlovchilar soni juda ko‘p bo‘lganligi sababli, har 10 000 xodimga atigi 166 ta robot to‘g‘ri kelgan.
Sanoat robotlari zichligi eng yuqori bo‘lgan iqtisodiyotlar reytingida Yevropa mamlakatlari 22 ta o‘rindan 15 tasini egallaydi. Bu ko‘p jihatdan rivojlangan avtomobil sanoati bilan bog‘liq.
Ayniqsa, bu bog‘liqlik Markaziy Yevropada yaqqol ko‘zga tashlanadi. Bu yerda to‘rtta reyting mamlakati mavjud: Sloveniya – har 10 000 ishchiga 315 ta robot, Chexiya – 216, Slovakiya – 210 va Vengriya – 172.
Xalqaro avtomobil ishlab chiqaruvchilar tashkiloti (OICA) ma’lumotlariga ko‘ra, 2024-yilda Slovakiya har 1000 aholiga 183 ta avtomobil ishlab chiqargan. Bu dunyodagi eng yuqori ko‘rsatkich bo‘lib, Germaniyadagi 51 ta avtomobildan uch baravar ko‘p demak.
Škoda Auto shtab-kvartirasi va ishlab chiqarish quvvatlari, shuningdek, Hyundai va Toyota zavodlari joylashgan Chexiyada 2024-yilda har 1000 aholiga 134 ta avtomobil ishlab chiqarilgan.
