Австрия менен Өзбекстан
арасындағы бирге ислесиў жылдан-жылға беккемленип, раўажланып бармақта. Усы
күнлерде мәмлекетимиздиң сыртқы ҳәм ишки ислер министрликлери делегациялары,
исбилермен топарлардың ўәкиллери елимизде болып, еки тәреплеме байланысларды
буннан былай да раўажландырыўға қаратылған бир қатар әҳмийетли илажларда
қатнаспақта.
Усы сапар етиў шеңберинде
Австрия Федерал ишки ислер министри мырза Герхард Карнер ҳәм Өзбекстан
Республикасы ишки ислер министри генерал-лейтенант Азиз Тошпўлатов арасында да
әҳмийетли ушырасыў болып өтти.
Тәреплер трансмиллий жынаятшылыққа қарсы гүресиў,
соның ишинде, нызамсыз миграция ҳәм адам саўдасының алдын алыў мәселелерине
айрықша итибар қаратып, еки тәреплеме бирге ислесиўди беккемлеў, жеке қурамның
бул бағдардағы билим ҳәм көнликпелерин арттырыў әҳмийетли екенин атап өтти.
Ушырасыўда терроризм ҳәм экстремизм, нәшебентлик
қуралларының нызамсыз айланысы, шөлкемлескен жынаятшылық сыяқлы халықаралық
қәўип-қәтерлерге қарсы гүресиў тараўында да жаңа басламалар алға қойылды.
Соның менен бир қатарда, қәўипсиз туризмди
раўажландырыў, миграция тараўындағы бар машқалаларды сапластырыў,
кибержынаятларға қарсы гүресиў тараўында тәжирийбе алмасыў, еки мәмлекет ҳуқық
қорғаў уйымларының оқыў орынлары арасында өз-ара бирге ислесиўди жолға қойыў,
хызметкерлердиң маманлығын арттырыў сыяқлы әҳмийетли мәселелер додаланды.
Илаж соңында делегациялардың басшылары Өзбекстан
Республикасы Ишки ислер министрлиги ҳәм Австрия Республикасы Федерал Ишки ислер
министрлиги арасындағы бирге ислесиўди беккемлеў бойынша өз-ара түсинисиў
меморандумына қол қойды.
Дослық ҳәм конструктивлик руўхта өткен ушырасыўда
жоқарыда атап өтилген көплеген бағдарларда бирге ислесиўди раўажландырыў
бойынша әҳмийетли ўазыйпалар белгилеп алынды.
Буннан тысқары, бирге ислесиўши мәмлекет ўәкиллерине
Ишки ислер министрлигиниң жумысы толық таныстырылып, заманагөй арнаўлы
техникалық қураллар ҳәм системаны санластырыў процесслериниң презентациясы
өткерилди.
