Бүгинги күнде дүньяда ушыўшысыз авиация технологиялары жедел раўажланып, аўыл хожалығы, санаат, транспорт, қала қурылысы ҳәм хызмет көрсетиў сыяқлы көплеген тараўларда кеңнен қолланылмақта. Дронлардан пайдаланыў өндирис нәтийжелилигин арттырыў, қәрежетлерди қысқартыў, ресурсларды үнемлеў ҳәм жаңа жумыс орынларын жаратыўда әҳмийетли факторға айланбақта.
Атап айтқанда, аўыл хожалығында егислик майданларын бақлаў, оларды қайта ислеў ҳәм өнимдарлықты мониторинг етиў, санаатта өндирислик процесслер ҳәм инфраструктуралық объектлердиң жағдайын қадағалаў, қалаларда транспорт ағымын бақлаў ҳәм көшелерде ҳәрекетти шөлкемлестириўде усы технологиялардан пайдаланыў үлкен имканиятлар ашады.
Мағлыўматларға қарағанда, глобаллық дрон базары жылына 10-15 процентлик пәт пенен өсип бармақта. Бул технологияларды экономика тармақларына кеңнен енгизиў мәмлекетимизде де экономикалық өсиўди жеделлестириў, жоқары маман қәнигелерге талапты арттырыў ҳәм жаңа технологиялық бағдарларды раўажландырыўға хызмет етиўи мүмкин.
Усы мүнәсибет пенен презентацияда Өзбекстанда ушыўшысыз авиация системаларынан пуқаралық мақсетлерде пайдаланыў имканиятларын кеңейтиў, тараўда исбилерменлик ҳәм инвестициялық жумыс ушын қолайлы шараятларды жаратыўға қаратылған усыныслар көрип шығылды.
Соның менен бирге, ушыўшысыз авиациядан пайдаланыўды кеңейтиў пәрўазлардың қәўипсизлигин ҳәм пуқаралардың жеке турмысының қол қатылмаслығын тәмийинлейтуғын заманагөй тәртипке салыў механизмлерин ислеп шығыўды талап етеди.
Бүгинги күнде дронлардан пайдаланыўдың бирден-бир қағыйдалары, оларды есапқа алыў ҳәм пәрўазларды муўапықластырыў, жеткерилген зыянды қаплаў және қамсызландырыў механизмлерин жетилистириў зәрүрлиги бар.
Усы мақсетте ушыўшысыз авиация қураллары ҳаққындағы мағлыўматларды бирлестиретуғын бирден-бир санлы мәлимлеме системасын қәлиплестириў, пәрўаз аймақларын анық белгилеў ҳәм олардан пайдаланыў тәртиплерин енгизиў бойынша усыныслар билдирилди.
Презентацияда бул жаңа бағдар ушын маман кадрларды таярлаў ҳәм инновациялық экосистеманы раўажландырыў мәселелерине де итибар қаратылды.
Атап айтқанда, келеси оқыў жылынан Транспорт университетинде ушыўшысыз авиация системалары бойынша қәнигелер таярлаўды жолға қойыў, билимлендириўди әмелий сабақлар менен үйлестириў, жаслардың заманагөй авиация технологияларына қызығыўшылығын қоллап-қуўатлаў режелестирилмекте.
Мәмлекетимиз басшысы тәрепинен жуўапкерлерге алдыңғы сырт ел тәжирийбеси тийкарында ушыўшысыз авиация системаларын экономика тармақларына кеңнен енгизиў, жергиликли өндиристи раўажландырыў, исбилерменлер ушын қолайлы шараятлар жаратыў бойынша нызамшылықты жетилистириўге байланыслы усыныслар таярлаў бойынша тапсырмалар берилди.
