Мақсетлер:
денсаўлықты сақлаў системасын бирден-бир стратегиялық режелестириў тийкарында раўажландырыў, мәмлекетлик ҳәм жеке меншик сектордың ролин, олардың медициналық хызметлерде қатнасыўының оптимал ҳәм нәтийжели механизмлерин белгилеў;
клиникалық ҳәм жәрдемши хызметлердиң жеке меншик секторынан аутсорсинг тийкарында сатып алыў көлемин 2030-жылға шекем басқышпа-басқыш 30 процентке жеткериў;
2030-жылға шекем кеминде 5 ири медицина шөлкемине жеке меншик инвестициялар ҳәм МЖШ, сырт ел басқарыў компанияларын тартыў.
2027-жыл 1-январьдан баслап денсаўлықты сақлаў системасын шөлкемлестириў ҳәм раўажландырыў бойынша узақ ҳәм қысқа мүддетли мастер-режелер тийкарында медициналық хызметлерге болған талапты есапқа алған ҳалда жеке меншик секторды тартыў механизмлери енгизиледи.
Онда кепилликли жәрдем көрсетиў ушын медицина мәкемелери мәмлекет ықтыярында сақланып қалады.
2027-жыл 1-январьдан баслап медицина мәкемелеринде хызметлерди жеке меншик сектордан аутсорсинг тийкарында сатып алыўдың жаңа тәртиби енгизиледи. Аутсорсинг шәртнамалары хызмет түри ҳәм инвестиция көлеминен келип шығып 5 жылға шекемги мүддетке дүзиледи (айырым жағдайларда 10 жылға шекем).
Онда, жаңа тәртип енгизилгенге шекем әмел етиў мүддети тамамланатуғын аутсорсинг жойбарларын 2027-жылдың ақырына шекем даўам еттириўге рухсат бериледи.
2027-жыл 1-апрельге шекем аутсорсинг жойбарларын дизимге алыў, есапқа алыў ҳәм әмелге асырылыўын мониторинг етиў бойынша "Медициналық аутсорсинг" электрон инфосистемасы енгизилиўи режелестирилген.
Медицина мәкемелерин профессионал басқарыўшыларға бериў ашық таңлаў тийкарында әмелге асырылады. Онда олардың жумысы ҳәр жылы нәтийжелилик көрсеткишлери (KPI) тийкарында баҳаланып барылады.
Денсаўлықты сақлаў министрлиги ҳәр жылы 1-ноябрьге шекем мастер-реже тийкарында жеке меншик инвестицияларды тартыў ҳәм мәмлекетлик-жеке меншик шериклик механизмлери шеңберинде әмелге асырылатуғын тийкарғы жойбарлар дизимин қәлиплестиреди ҳәм өзиниң веб-сайтында жәриялап барады.
Ҳүжжет Нызамшылық мағлыўматлары миллий базасында жәрияланған ҳәм 04.11.2026-жылдан күшке кирген, деп жазады «Norma».
