"Өрт қәўипсизлиги ҳаққында"ғы нызамда өрт аудити белгиленген. Оны шәртнама тийкарында АЖМ тәрепинен аккредитациядан өткерилген шөлкемлер өткереди, унамлы жуўмақ берилген жағдайда өрт қадағалаўы уйымлары бир жыл даўамында объектти тексермейди, оператив тексериўлер буннан тысқары.
Базарлар, саўда комплекслери ҳәм саўда-кеўилашар орайларының мүлк ийелери үшинши шахслар алдындағы пуқаралық жуўапкершилигин ҳәм объектлердиң өзин өрттен қамсызландырыўы шәрт. Бул ўазыйпаны орынламағаны ушын лаўазымлы шахсларға БЕМның 50 есесинен 75 есесине шекем, қайта әмелге асырылмаған жағдайда болса БЕМның 75 есесинен 100 есесине шекем жәрийма салынады.
Тексериўлер объекттиң өрт қәўиплилиги топарына қарап өткериледи: 1-топар объектлери – жылына көби менен бир мәрте, 2 – еки жылда бир мәрте, 3 – үш жылда бир мәрте, 4 – мүрәжатлар тийкарында. Исбилерменлик субъектиниң жумысы 10 жумыс күнинен артық мүддетке тек ғана суд арқалы тоқтатып турылады.
Бурын нызамда пуқаралардың өрт ақыбетинде жеткерилген зыянды қаплаў ҳуқықы ғана белгиленген еди. Енди өмирге ҳәм денсаўлыққа зыян жеткерилгенде суд айыпланыўшыға қосымша түрде: қайтыс болған жағдайда БЕМның 3 мың есесине шекем, I топар майыплығы болған жағдайда БЕМның 1 мың 500 есесине шекем ҳәм денсаўлыққа басқа да зыян жеткерилгенде БЕМның 600 есесине шекем компенсация төлеўди мәжбүр етиўи мүмкин.
Бийиклиги 28 метрден жоқары имаратлар ушын қосымша талаплар белгиленген: түтинсиз басқышлар, өрт өшириўшилер ушын лифтлер, фасадтың жанбайтуғын етип пардозланыўы. Имарат ҳәм объектлер функционал өрт қәўиплилигиниң бес класына (Ф1-Ф5) бөлинген.
Қурылыс тараўында руқсатнама бериўге лаўазымлы шахс тәрепинен нызамсыз араласыў БЕМның 100 есесинен 150 есесине шекемги муғдарда жәрийма ямаса 15 суткаға қамаққа алыўға, қайта араласыў болса еки жылға шекемги мүддетке еркинен айырыўға алып келеди. Автомобильге газ қуйыў шақапшаларында турмыслық баллонларда суйылтырылған газ берилгени ушын БЕМның 3 есесинен 5 есесине шекемги муғдарда жәрийма салынады.
Ҳүжжет Нызамшылық мағлыўматлары миллий базасында жәрияланған ҳәм 05.02.2027-жылдан күшке киреди, деп жазады «Norma».
